Orfanato São José de Baguia-Uma ba Edukasaun ~ KREATIVU NAFATIN

Orfanato Baguia-Orfanato Baguia Ou uluk ami bolu ho naran Asrama Baguia. Uma mahon neebe mak sai fatin Ba Baguia oan lubun ida, Laos husi Baguia Oan deit, balun husi Laga, Quelicai, Viqueque no fatin seluk mos. Uma Nee mak sai fatin ba Labarik sira neebe mak hanaran familia la iha kbiit no kapasidade hodi hare sira nia eskola. Tamba nee inan-aman mai hasoru padre sira atu bele hela iha uma nee mak halao nia estudu. Orfanato Baguia lokaliza Iha Baguia Vila iha kedas igreja nia kotuk. Sai mos hela fatin mai hau, sai hau nia uma durante tinan balun nia laran hodi halao hau nia estudu iha Baguia Vila. Hau ladun hatene historia tinan barak ba kotuk molok hau hela iha fatin neeba, maibe hau sei lembra no hatene hau nia hitoria sira neebe mak hau hasoru durante hau hela iha fatin furak nee.

Hau hahu Sama ain iha Orfanato Baguia hodi sai hanesan hau nia uma Bainhira hau hahu hakat ba SD kelas 4 iha tinan 2004, Iha fatin neeba iha ema balun bot no balun kik. No memontu neeba Hau nia Maun Jose pereira (Matebian) hela uluk tiha ona iha orfanato. Iha tempu neeba orfanato São José de Baguia Tau matan husi Padre Saleziano sira neebe mak hela iha Laga, no iha orfanato nee Iha Ema neebe mak normalmente ami bolu ( Bin ou Maun ) sira mak loron-loron tau matan mai ami, no sira mos hela iha uma nee. Moris iha orfanato Baguia momentu neeba ami nia atividade sira mak hanesan Fai Batar hodi daan ho koto, Estuda, hili ai, kuru be no seluk tan. Maske ho labarik sira neebe mak idade kiik oan maibe ami hotu-hotu hetan instrusaun husi Bin no Maun sira atu bele halao serbisu sira tuir Horario hotu. Moris iha Orfanatu Baguia, Fatin neebe mak furak liu mai ami hodi hahu no hamoris prosesu aprendizazen husi eskola primaria to remata Pre-secundaria, atividade hotu-hotu tuir horario no tuir Oras, maske iha situasaun neebe mak difisil barak maibe sempre obedese ba regra sira hodi moris tuir. Iha Atividade sira neebe ka ami halao iha orfanato nee fahe hotu Horario hahu husi Tein, fase bikan, Hamos uma laran, Serve iha refeitorio, kuru be, hili ai no sluk tan. Iha orasaun, iha missa, iha muzika no desportu, no seluk tan hodi forma ami iha prosesu tomak.

Durante hela iha orfanato, ami mos sempre hetan vizita husi Belun sira neebe mak husi estranjeiru, baibain bolu malae hehehe, no hetan ajuda husi Australia, husi Father Chris Rileys youth off the streets no parte balun tan neebe mak la konsege temi atu nunee atividade sira bele funsiona nafatin ho diak.

tuir mai foto Balun iha 2007 no 2008

Nudar pessoal hau sente haksolok no kontente bele hetan oportunidade hodi hela iha fatin furak nee atu bele halao hau nia estudo ho diak. Iha historia barak neebe mak ami hasoru durante hela iha fatin furak nee, hahu husi kontente, triste, tanis, hamlaha, kole no seluk tan. Dala barak ami halo sala tenke hetan baku husi Ami nia Bin bot sira no Maun bot Sira. Hau sei relembra no hanoin hetan bin no Maun sira neebe mak uluk Tau matan mai ami iha orfanato Baguia mak Hanesan Bin Justina, Bin Julia, Bin Carlota, Bin Juliana, Bin Teresa, Bin Eka, Bin Rosa ,Tia Nata, Maun Sabino no Seluk tan, no mos (Mana Tina neebe mak ami baibain bolu Mana way no Maun Luis neebe mak baibain ami bolu Baino. Husi Sira nia liman no serbisu mak bele prepara ami ba ami nia futuro. Origado ba imi hotu no hakohak bot.

Depois de remata Iha Eskola Pre-secundaria ami komesa hakat ain husi Fatin nee, Maske ha sentimentu neebe mak bot no lakohi atu husik fatin nee maibe edukasaun neebe mak obriga no tenke hakat nafatin ba oin. No ho fiar metin katak loron ruma sei mosu fali iha fatin nee. Ami hahu hakat ain husi Fatin nee iha tinan 2010 no Depois De tinan Barak Ami la konsege fila-fali ba orfanato hodi halao atividade ruma tamba ho situasaun no tempu neebe mak la dun fo oportunidade.

Hau sente kontente los iha fulan ikus ba Tinan 2020 nian, iha fulan Desembro nee tamba ami hetan oportunidade hodi ba fali iha orfanto Baguia Dala ida tan, hodi prepara ba iha festa “ A noite cultural no concerto musical “ hodi selebra festa Natal no tinan foun 2021 hamutuk ho komunidade Baguia, neebe mak realiza husi Quase Paroquia Baguia hamutuk ho komisaun organizadora, MAKSALAK mos hola parte iha festa nee entaun hau sente kontente no hau bele ba hare fali fatin sira neebe mak ami hela ba, momentu sei kiik. Momentu nee mos Ami rua hau nia Belun Augusto alves, nia mos nudar ema neebe mak uluk ami rua hela hamutuk iha orfanato Baguia no eskola hamutuk iha kelas ida, no ami bele hetan oprtunidade tan hodi ba hela neeba besik semana rua, no serbisu neebe mak ami halao la hanesan maibe iha fatin neebe mak hanesan. Fatin balun neebe mak iha mudansa no fatin balun mos nafatin hanesan uluk ,halo hau hanoin tuir memoria sira neebe mak hau hasoru iha prosesu neeba.

Hau hanoin iha hau nia laran katak “pasti natureza sira nee sei kunhese hau, pasti fatin sira nee sei kunhese hau tamba hau mos hela iha fatin nee ba tinan barak”.

Ohin Loron Baguia Sai Quase Paroquia Ona, Orfanato Baguia tau matan fali husi Padre Diocesano sira no daudaun nee hetan prezensa husi Padre Roberto José Boavida ( Amu Oback) no Padre Salvador Gaspar Florindo (amu Sala), no mos Hetan tulun husi Madre sira no frater sira hodi bele forma alin kiik sira hodi prepara ba futuru neebe mak diak.

Durante Hau hela iha hau nia fatin uluk nee, hau iha esperansa neebe mak boot katak ho prezensa Amu Nain rua, madre sira no frater sira nee sei lori Buat barak neebe mak diak hanesan edukasaun, matenek, espiritual no talentu iha area oioin ba iha Alin sira iha orfanato São José Baguia.

Iha neeba hau hasoru mos Padre Salvador Gaspar Florindo neebe mak daudaun nee nuudar Vigario iha Quase Paroquia Baguia, hau sente orgulho ho prezensa Amu neebe mak ho vontade makaas tebes hodi Suporta Baguia oan sira iha area oioin, serbisu makas Ba Baguia No orfanato Atu bele lao nafatin ba oin maske hasoru dezafius oioin. Iha mos Madre sira neebe mak tulun alin sira iha tividade sira, iha frater balun neebe mak ajuda Hanesan Frater Dino no seluk tan.

Dadaun nee orfanato Baguia Mos iha planu nia laran atu halo rehabilitasaun, no iha momentu especial nee mos hau hasoru belun diak sira neebe mak sai hanesan tekniku iha fatin nee, sira husi Oecusse oan Sira, sira mak Maun Adry, Maun Faby no seluk tan. Sira iha Hanoin neebe mak diak hodi halo diak ba iha orfanato Baguia.

No ikus hau hakarak rezumu deita katak Orfanato Baguia Sai hanesan Hau nia fatin uluk neeb mak hau hela hodi luta bah au nia futuru, Iha Iha sentiment neebe mak forte tebes ba fatin nee no hau espera katak hau sei iha nafatin oportunidade iha futuru hodi bele vizita no hare ami niafatin nee.

Agradese ba ema hotu neebe mka serbisu makaas ba ornafato Baguia nia diak. Hakohak boot ba hotu-hotu.

Agradse wain tamba hetan ona oportunidade hodi Selebra tina foun 2021 iha Orfanato Baguia Hamutu ho Padre sira, Madre sira, frater, irmaun no alin sira iha orfanato nee.

Tuir mai foto balu neebe mak ami foti iha Orfanato Baguia.