BIOGRAFIA OFISIÁL — MAKSALAK

 

BIOGRAFIA OFISIÁL — MAKSALAK

MAKSALAK — “Hakat Ida, História Ida”

MAKSALAK mak grupu banda moderno hosi Dili, Timor-Leste, ne’ebé ofisialmente harii iha loron 12 Jullu 2015. Banda ne’e koñesidu tanba nia energia iha palcu, letra música ne’ebé forte, no nia identidade timoroan ne’ebé mistura ho estilo rock, pop no inspirasaun nasionalista.

Hahu hosi grupu estudante iha Colégio Fatumaca, MAKSALAK liu hosi dalan naruk ida ho luta, amizade no esperansa antes sai hanesan banda ida ne’ebé agora hetan rekoñesimentu iha Timor-Leste.

História no Viagem Muzikál

Antes uza naran MAKSALAK, banda ne’e hahú ho naran “THE STAR” iha tinan 2012, bainhira estudante Departamentu Eletrónika sira forma grupu ida atu partisipa iha konsértu Valentine’s Day iha Colégio Fatumaca. Ho talentu no vontade forte, sira konsege hetan Segunda Lugar iha kompetisaun ne’e.

Iha tinan 2013, grupu ne’e troka nia naran ba “THE TRUTH”, inspiradu hosi versíkulu Bíblia João 8:32 kona-ba lialoos no liberdade. Iha períodu ne’e, banda ne’e hahú hakerek música orijinál no tampil iha eventu edukasionál no sosial sira.

Maski enfrenta difikuldade barak hanesan falta ekipamentu, tempu treino limitadu no perda membru importante ida, banda ne’e kontinua forte. Mate Jose Pereira (“Aje”) iha tinan 2015 sai momentu dolorozu ba grupu ne’e, maibé mos sai motivasaun boot atu kontinua lori muzika ba oin hanesan forma homenagem no dedikasaun.

Iha loron 12 Jullu 2015, banda ne’e muda oficialmente nia naran ba “MAKSALAK”, ho lema:

“Hakat ida, História ida.”

Lema ida-ne’e reprezenta luta, esperiénsia no viagem ne’ebé banda ne’e liu husi hahú too agora.

Estilu Muzika

MAKSALAK lori identidade músikal ne’ebé mistura:

• Rock moderno
• Pop Timor
• Música inspirasaun nasional
• Balada emosional

Sira nia letra barak koalia kona-ba:

• Domin no amizade
• Esperansa no luta moris
• Patriotizmu
• Juventude no realidade sosial Timor-Leste

Membru Ofisiál (2026)

• Cesaltino Barros Pereira (“Altty”) — Vocalista no Guitarista
• Augusto Alves Freitas (“Agus”) — Bassista
• Armenio — Pianista
• Dominic — Pianista
• Fernando Antonio Pereira (“Nando”) — Guitarista no Vocal 2
• Jeny — Drummer

Música Sira

MAKSALAK produz ona músicas original balu ne’ebé hetan apoiu hosi fãs sira iha Timor-Leste:

• “Prontu Atu Simu O” (2017)
• “Heroi Timor” (2022)
• “Tan Nia, O Hakanek Hau” (2025)
• “Timor Rai Lafaek” (2025)
• “Espiritu Maubere” (2025)

Konquista

Iha tinan 2025, MAKSALAK hetan rekoñesimentu importante:

• Favorite Band 2025 — Timor-Leste Music Awards 2025
• Second Runner-Up — Battle Bands Timor Plaza 2025

Vizaun

MAKSALAK iha mehi atu kontinua dezenvolve indústria muzika timoroan no lori música Timor-Leste ba nivel internasionál. Ho kreatividade, perseveransa no identidade kultura timoroan, banda ne’e komprometidu atu kontinua inspira juventude no fãs sira liu hosi muzika.

“Música la’ós deit entretenimentu, maibé história, luta no identidade.” — MAKSALAK