HADOMI NO RESPEITA INAN-AMAN [ Husi Altty_MAKSALAK]

                                                                                            Husi : Cesaltino Barros Pereira [Altty MAKSALAK]

Inan-Aman mak hanesan Segundo Maromak (Second God) Iha ita nia Moris.Se la iha Inan-Aman ita la bele Moris no Ita labele halo buat ida.Inan-Aman sempre  hare ita,Tau matan mai ita husi Kiik too Boot,Maske Ita oan sempre la  dun halo tuir sira nia hakarak maibe sira sempre iha mai ita.

Maluk sira...

Hau mos nuudar oan ida neebe dala ruma mos sempre kontra inan-Aman.Dala ruma Tur mesak halo refleksaun,Hau sente katak Tuir lolos Inan-Aman mak Ema neebe importante liu mai ita iha ita nia moris,Ita tenke hanoin nafatin katak inan-Aman nia hakas-an,inan-aman nia serbisu ita oan imajina la bele too.

Tanba nee hau hakarak hakerek hau nia hanoin oituan kona ba Inan-Aman iha Hau nia Site Ofisial ida nee.Maske ho matenek neebe mak natoon maibe hau fiar katak belun sira mos bainhhira lee ida nee bele mos fo agradese ba inan-Aman no rekonhese sira nia serbisu tomak durante sira halo mai ita.

Belun sira.....

Ami iha familia ida nia laran ema barak,Ami oan hamutuk Nain 13 maibe Agora nain 4 mate fila-fali ba Aman Maromak nia kadunan.Mai husi Familia neebe mak simples,familia neebe mak toos nain,Maibe ema barak los entaun susar mai ami atu bele hetan isin diak,tanba susar mai ami atu ami bele hetan hahan.Inan-aman serbisu mate an iha toos Laran tan deit atu hare ami,fo haan ami.

Iha ema barak neebe mak kolia at hau nia inan aman,balun hamnasa iha sira nia oin,balun hahaek tanba hare ba ami nia moris.Maibe Hau nia Ama-Apa sempre Hatan ho tanis deit.Liafuan neebe mak sira sempre dehan ba ami oan sira mak “La iha buat ida ita kiak ba hahan Maibe naran katak ita riku ba ba ema”.Lia fuan nee hau rona beibeik bainhira hau sei kiik no too agora hau nunka haluha.

 Agradese tebes tanba bele hetan inan-aman neebe mak maske kiak maibe sempre hadomi oan sira.Los duni katak ema nia liafuan neebe mak dehan “Leaun Animal neebe mak siak liu maibe nia nunka haan nia oan”.

Belun sira realidade iha ita nia moris,ita sempre kontra inan-aman,ita sempre refila inan-aman,ita sempre bosok inan-aman,inan-aman kolia ita la rona maibe tuir lolos nee hau belun sira ita tenke halo refleksaun  no ita tenke rekonhese katak se la ho inan-aman nia prezensa ita la iha forsa,ita fraku tebes no ita sei nunka halo buat ida,ita sei hanesan ai-tahan neebe mak anin hu’u ba hu’u mai deit.

Belun sira....

Inan Mak ema neebe sempre pasiensia liu,Nia dala barak tanis deit bainhhira nia sente buat barak neebe mak falta iha familia laran no buat barak neebe mak falta  ba ita oan sira,Inan sempre estima ita bainhira ita kolia liafuan nebe mak kasar,Inan sempre hadomi ita maske Dala ruma Nia hirus ita,Dala ruma nia siak ita,Maibe Nia sempre koalia buat neebe mak diak mai  ita,Inan ema neebe besik liu mai ita oan sira,Inan ema nebe mak kuidadu ita oan durante fulan 9 iha Nia kanotak,Hafoin moris mai Nia sempre tau matan ba ita oan sira too boot.Inan  mak ema neebe Sempre hatene ita oan nia hakarak nee saida,Nia sempre halo tuir buat nebe mak ita oan presiza,Nia mak sempre hatoo ita nia hakrak ba Aman atu bele Serbisu makas hodi responde ba ita nia necesidade.

Belun sira Aman mak ema neebe serbisu makaas liu,Serbisu Mate-An tan deit ita oan sira,no Aman serbisu makaas tanba deit atu bele responde ba nesesidade iha uma laran.

Loos duni katak Aman la duun iha tempo atu bele hamaluk ita oan Nia maibe sira sempre hanoin nafatin ita iha fatin neebe mak nia serbisu ba.Aman nunka haluha Atu serbisu makaas atu bele hetan hahan,hetan osan ba familia.Nuudar Xefe Ba familia ida Aman sempre Proteze ita iha Situasaun hotu-hotu,Aman sempre hanoin loron kalan Atu ita bele hetan moris diak.Karik Serbisu mak la hotu,Kalan nia sempre hader deit oinsa mak nia bele halo serbisu nee too hotu.Aman Serbisu iha Loron Laran,Iha udan Laran,Hamlaha,Hamrok maibe Nia sempre hatudu oin hamnasa,Nia hafalun nia terus ho Hamnasa,ho oin midar tan deit ba ita oan sira.Agradese barak Ba Maromak tanba Fo Mai ita Aman neebe mak diak atu bele Akompanha nafatin ita,serbisu makas mai ita iha familia laran.

Belun..

 Ita tenke agradese barak ba inan-aman,ba hahalok hotu neebe mak sira halo mai ita,sira fo sira nia moris tomak ba ita oan sira nia Diak.Maske dala barak ita kontra sira,ita bosok sira maibe sira sempre hadomi ita iha sira nia moris tomak.

Ita reza ba ita nia Inan-Aman Atu Nai bele fo bensa ba sira,fo moris naruk ba sira atu sira bele isin diak nafatin atu bele nafatin iha ita nia sorin.Amen....

Belun sira Agradese Tanba imi hadomi Inan-Aman,Ita hadomi Inan-Aman.

Karik Hau hakerek sala liafuan balu, no Karik hau koalia sala karik Deskulpa barak,nee mak kapasidade ita ema nian.....