Historia Jose pereira
Ex bassist MAKSALAK
Jose pereira husik mundo bainhira nia halao nia estudo Iha
UNTL,politecnica Hera,departamento Informatica iha semestre 5.
HISTORIA HAHU
Jose pereira ho naran badak AJE moris iha loron 21 de agosto
de 1990 husi Aman Antonio Pereira no inan Teresa Barros.Maske husi familia
neebe mak kiik no simples maibe nuudar Aman no inan Antonio Pereira no Teresa
Barros buka meios oioin atu bele tau matan ba Jose pereira Too boot ho
esperansa katak loron ida Jose pereira bele tau matan fali ba sira.
JOSE PEREIRA iha maun alin nain 4 no feton nain 5 mak :
Julião B.Pereira, Januario B.Pereira ,Cesaltino B.pereira, Fernando B.pereira.
Zulmira B.Pereira, Mariana B.pereira, Santina B.Pereira, Julieta B.pereira,
Angela Barros.
Iha tinan 2000 Jose pereira komesa halao nia estudo iha
escola primaria Catolica São Jose de Baguia no Jose pereira hela iha
Orfanato São Jose de Baguia.
jose pereira hamutuk ho nia maluk sira iha orfanato Baguia, nia mak kaer Aqua nee
Jose pereira remata nia estudo iha escola primaria Catolica
São Jose de Baguia iha tinan 2005 no hahu kontinua nia estudo iha Escola
pre-secundaria Catolica São Jose de Baguia husi Tinan 2006. Durante Jose
pereira halao nia estudo iha Escola Pre-Secundaria catolica São Jose de Baguia
mos nia Nafatin hela iha Orafanato São Jose de Baguia, Tamba nee Jose pereira hela
iha Orfanato nee ho Durasaun tinan 7. Iha tinan 2008 Jose pereira remata nia
estudo iha escola secundaria Catolica São Jose de Baguia hodi passa ba iha
nivel Secundaria.
Iha Tinan 2009 Jose pereira kontinua fali nia estudo iha
Colégio Fatumaca,ESCOLA TECNICA PROFESSIONAL DE DOM BOSCO FATUMACA (ETP).
Iha ETP Jose pereira prefere Departamento ELETRICIDADE
(listrik). Durante Halao estudo iha Colegio Fatumaca Jose pereira apriende buat
barak kona ba Espiritual no Matenek neebe Mak Dom Bosco Rai Hela liu husi
Kongregasaun Saleziano. Iha parte
Eletrisidade Jose pereira mos konsege apriende barak no hatene barak
kona ba parte eletricidade. Iha Tinan 2011 mak tinan ikus ba Jose pereira
hanesan estudante Colegio Fatumaca. Liu husi nia hakas an no nia sakrifisiu mak
iha loron 2 de Dezembro Jose pereira hetan Diploma Escola tecnina professional
nian no hatudo katak Jose pereira remata ona nia estudo iha Colegio Fatumaca no
iha momento nee Jose pereira mos sai ona hanesan Antigo aluno Saleziano.
Depois de remata estudo iha colegio Fatumaca, Familia no ema
barak mos sente orgulho no tau fiar katak Jose pereira sei bele halo buat ruma
neebe mak diak ba iha sosiedade kona ba buat neebe mak nia apriende ona iha
colegio Fatumaca.
Iha Tinan 2012 Jose pereira tuir test iha UNTL no konsege
nia passa maibe nia labele kontinua tamba nia hakarak loke uluk Electrical
service atu bele hadia sasan sira neebe mak iha parte eletrisidade nian tamba
nia hahu tiha ona nia service.
Iha tinan 2013 Jose pereira tuir tan fali test no ikus mai
Nia passa nafatin tamba nee Jose pereira konsege halao nia estudo iha UNTL,
Faculdade de Engenharia No departamento Informatica [ IT ].
Durante halao estudo iha UNTL Jose pereira nafatin mos halao
nia Sevice Eletrica nuudar ema tecnica.
Semestre 2 iha Tinan 2013 no hahu semestre 3 no 4 iha tinan
2014, Jose pereira nafatin halao nia estudo no ho serviso Eletrika dala ida.
Maske kole, terus, no susar oioin maibe Jose pereira ema neebe mak uniko no
hasouro dezafiu sira nee ho hamnasa no kontente Tama Jose pereira iha
karakteristika mak gosta Ransu no halo belun ho ema hotu, gosta partisipa iha
missa, no partisipa iha muzika. Durante Jose pereira halao nia servisu Nia
konsege ajuda duni familia, belun no mos ema barak nebe mak presiza nia tulun.
Alem de Escola no servisu nuudar ema tecnico, Jose pereira
mos iha talenta furak ida mak Toka no halo muzika. Jose pereira mos nuudar ema
tokador no dala barak mos Nia toka iha Igreiza.
Durante halao kareira nuudar ema muziku, Jose pereira mos
sai hanesan tokador iha Centro formasaun Santa Rafaela, Bebonuk, Dili.
Hamutuk ho MAKSALAK. No harii mos grupo ida neebe kanta iha
missa iha Capela Tasi tolu.
Iha Tinan 2014 Jose pereira hamutuk ho Nia alin Cesaltino
B.Pereira [ Altty ] konsege harii Band MAKSALAK no Jose pereira sai hanesan
Bassist Iha banda MAKSALAK hamutuk ho nia maluk sira mak hanesan Aghus alves no
Mozhy. Ho ksolok Jose pereira fo duni nia kontribuisaun barak ba iha MAKSALAK.
Durante kareira Jose pereira mos lori MAKSALAK partisipa iha atividade barak kona
ba muzika nian no mos tuir konserto neebe mak halao iha publiku.
Tama ba 2015 Jose pereira mos prepara fali ekipamentos barak
kona ba Eletrisidade nian atu bele halo boot tan nia service eletrica nian iha
Terminal Becora, Dili no Jose pereira deside atu Cuti tinan ida mak atu
kontinua eskola fali maibe Nia Maun Boot Julião Barros pereira mak la konkorda
tamba nee Jose pereira mos deside hodi hakas an atu halao Serbisu no estudo dala ida. Hahu husi fulan Janeiro
Tinan 2015 Jose pereira halao nia atividade hanesan baibain.
Tama ba iha fulan fevereiro, iha loron Sabado 14:02:2015
Jose pereira halao loron Valentine Day hamutuk ho nia kolegas sira ho kontente
no depois de Loron tolu Jose pereira husik Mundo.
Iha loron segunda feira 17:02:2015 iha Loraik mosu udan boot
neebe mak hafalun ho kalohan nakukun no anin boot Familia Jose pereira nian
sente triste no la iha ona hanoin neebe mak diak tamba Rona katak listrik Xoke
Jose pereira iha Tasi tolu no labele salva.
Jose pereira husik mundu no fila hikas ba iha Aman Maromak
nia kadunan iha Loron segunda feira 17:02:2015 loraik mais ou menus Tuku haat .
Jose pereira nia Mate hanesan Misterio Tamba tuir kronologia
katak Jose pereira atu haris tamba nee nia ba atu liga Sanyo mak listrik xoke
maibe la iha sinal neebe mak hatudo katak Jose pereira husik Mundo tamba
Listrik mak Xoke.
Ho akontesimento nee lori triste boot ba iha Jose pereira
nia familia tamba ema neebe mak sira garante atu tulun no ajuda sira iha futuro
la iha ona iha sira nia sorin.
Aman Antonio Pereira no Inan Teresa Barros sente la too atu
moris tamba, husi familia neebe mak kiik no simples sira buka hakas an no buka
meios oioin hodi tau ba matan ba Jose pereira husi kiik too boot, maibe
bainhira eskola ona no matenek ona atu hare fali sira oinsa mak Nai bele bolu
tiha fali nia.?
Maibe la iha buat ida Familia entrega deit ba Nai Maromak
karik nee Maromak Nia planu neebe mak diak liu ba Jose pereira.
Liafuan husi FAMILIA..
"Tempu mak kondisaun furak ida ba ita nia hare malu,
Moris mak grasa no degrasa husi Nai Maromak.
Fatin mak espasu kiik oan ida ba ita nia hasouru malu, ita
nia relasaun familia nian no fo oportunidade mai ita atu hasouro malu no hare
malu.
Hamnasa suli sai husi ita nia fuan, ksolok profunda ita
sente husi malu, tempu halai ba ita basá ita la para hamnasa..ita nia tempu
besik ba daudaun, ita nia distansia mos sai dook ba daudaun ona..
Fuan bomba makaas maibe matan wen la sai, kabun hahu dulas
no ulun hahu moras bainhira hanoin ba tempo no fatin....
Ami arepende no hanoin la too maibe buat hotu liu ona.....
Maibe tempu too ona ami tenke husik o ba ho didiak..
Maske ita dook malu maibe ita familia nafatin..
Iha tempu mamuk favor ida fila-fali mai ami liu husi ami nia
hanoin..
Hanoin tuir fali ksolok neebe mak ita fahe ba malu ona..
Hanoin tuir fali moris neebe mak ita halao hamutuk ona..
Hanoin tuir fali fatin neebe mak ita hare malu no fahe
ksolok ba malu
Halo ami hanoin la too......
Fila-fali mai mai ba, iha ami nia hanoin maske minuto ida
deit..
Ami reza ba o atu ita familia nafatin..
Maske la iha ona tempo ba ita,maske la iha ona fatin ba ita
atu hasoru malu.Maske nunee ita familia ba nafatin iha hanoin,iha orasaun no
iha fuan...
Rai nee furak tebes,Rai nee nakonu ho buat barak..
Rai nee nakonu ho hamnasa..
Tansa o lakon husi ami nia hare..?
Tansa o lakon husi ami nia sentimentu....?
Tansa o hasees an husi ami nia sorin...?
Tansa o lakon husi ami nia mehi kalan nian..?
O lakon no la husik hela liafuan ikus..
O hakarak atu ami hela mesak..??
Se mak sei tau matan mai ami bainhira o abandona ami...?
Se mak sei hataan mai ami bainhira ami husu mahusuk..
Se mak sei hamaus ami bainhira ami tanis..??
Se mak bele..se laos o..??
Ami tauk tebes atu hatan ba ema nia mahusuk kona ba o..??
Ami laran moras laran moras bainhira ema seluk haksolok
hamutuk..
Tansa o labele hamutuk ho ami..?
Ami arepende no hanoin la too maibe buat hotu liu ona,ami
tenke simu realidade neebe mak iha.
HO LIAFUAN IKUS.....
Ami hatoo ami nia agradese Uain ba hahalok hotu neebe mak o
halo ona durante o moris hamutuk ho ami iha mundo nee....
Ami sei la haluha reza nafatin ba o..
Atu ita familia nafatin.....
Adeus ami nia Oan..
Adeus ami nia Maun.....
Adeus ami nia alin..
Adeus Jose pereira...
MAI AMI O NIA DOMIN LA IHA ROHAN.....
O sei sai hanesan ami nia Mahein...
Husi :FAMILIA
Hakerek nain : Altty MAKSALAK & Zulmira B.Pereira.
Se ita boot kunhese Jose pereira..???
Se ita hadomi Jose pereira..
Bele fahe tutan mos ba kolegas hotu...
Ami sempre hadomi o iha ami nia moris tomak....JOSE PEREIRA
No comments:
Post a Comment